कल्याण रेल्वे स्थानकाजवळील एका प्रामाणिक रिक्षा चालकाने रिक्षात नजरचुकीने राहिलेली एका प्रवाशाची एक लाख साठ हजार रुपयांची रक्कम परत केली. सांगली जिल्ह्य़ातील इस्लामपूर येथील विशाल रावल आपल्या भावाच्या लग्नासाठी साहित्य खरेदीसाठी कल्याणमध्ये रविवारी आले होते. सोबत एक लाख साठ हजार रुपयांची रक्कम एका पिशवीत होती. कल्याण रेल्वे स्थानकात लालचौकीकडे जाणाऱ्या रिक्षामध्ये विशाल रावल बसले. उतरताना ते पैशाची पिशवी घेण्यास विसरले. घरी गेल्यानंतर पैशाची पिशवी रिक्षात विसरल्याचे त्यांच्या लक्षात आले. त्यांनी तातडीने महात्मा फुले पोलीस ठाण्यात तक्रार केली. दरम्यानच्या काळात रिक्षाचालक दानिश खोत यांना रिक्षात एका प्रवाशाची पिशवी विसरल्याचे लक्षात आले. त्यांनी ती कल्याण रेल्वे स्थानकाजवळील रिक्षा संघटनेच्या कार्यालयात आणून दिली. पोलीस आणि रिक्षा संघटनेच्या पदाधिकाऱ्यांनी ही पैशाची पिशवी विशाल रावल यांना परत केली.