वाहनाची दुचाकीला धडक; पत्नी जागीच ठार, पती गंभीर

तुळजापूर-लातूर रस्त्यावर आठवडय़ात दुसऱ्यांदा अज्ञात वाहनाची मोटारसायकलला धडक बसून पत्नी जागीच ठार, तर पती गंभीर जखमी झाला.
औसा तालुक्यातील वांगजी पाटी-काजळी चिंचोलीदरम्यान मंगळवारी सकाळी हा प्रकार घडला. बेलकुंडकडे जाणाऱ्या एमएच ४४ ए २१३ या मोटारसायकलवरून अज्ञात वाहनाने धडक दिली. यात रंजिता रमेश थोरे (वय ४०) जागीच ठार, तर पती रमेश चोकोबा थोरे (वय ४७, कमालपूर, तालुका लोहारा) गंभीर जखमी झाले. त्यांना पुढील उपचारासाठी लातूरला हलविण्यात आले. पोलिसांची गस्त नसल्याने गेल्या आठवडय़ातही धडक देऊन गेलेल्या अज्ञात वाहनाचा तपास लागला नाही. धडक देऊन तसेच निघून जाणाऱ्या वाहनाचा पाठलाग काहींनी केला. एमएच १३-७३५२ या वाहनास पकडण्यात आले. उजनीपासून ३ किलोमीटर अंतरावरील कमालपूर (तालुका लोहारा) गाव आहे.
तुळजापूर-लातूर रस्त्यावरील वाहतुकीत चांगलीच वाढ झाली आहे. या मार्गावर चालणाऱ्या वाहनांकडे पोलिसांचे सतत दुर्लक्ष होत असल्याने वाहने भरधाव वेगात नेली जातात. गेल्या आठवडय़ात बोरफळ, शिवली पाटीनजीक मोटारसायकलस्वाराला अज्ञात वाहनाने उडवले होते.