भ्रष्टाचारमुक्त आरटीओ कार्यालय फतव्यानंतर वाशी येथील आरटीओ कार्यालयाबाहेर पदपथावरील दलालांची वर्दळ शमलेली होती. ऑनलाइन प्रक्रिया याबाबत तसूभरही माहिती नसल्याने हैराण झालेल्या नागरिकांकडून आरटीओ कार्यालयात अनेक प्रश्नांचा भडिमार सुरू होता. त्यामुळे अधिकारी-कर्मचाऱ्यांचे चेहरे लालबुंद झाले होते.
वाशी येथील आरटीओ कार्यालय परिसरात कार्यरत असणारे एजंट काम बंद आंदोलनामुळे सकाळपासूनच दिसेनासे झाले होते, तर अनेक फोन आणि येणाऱ्या नागरिकांना बाहेरच्या बाहेरच थेट आरटीओ कार्यालयात जाऊन अर्ज भरण्याचे सूचित करीत होते. वाशी येथील कार्यालयात आलेल्या प्रत्येक नागरिकाला एजंट नसल्यामुळे अनेक समस्यांना सामोरे जावे लागले. अर्ज भरायचा कसा इथपासून ते परवाना चलन भरण्यापर्यंतच्या प्रत्येक खिडकीवर भटकंती करावी लागली. तितके करूनही हाती काही न लागलेल्या नागरिकांनी बंददरम्यान थेट घरी जाण्याचे पसंत केले. तर अनेक एजंटांनी काम बंद आंदोलन सुरूच ठेवणार असून याकडे सरकारचे लक्ष वेधण्यासाठी युनियनच्या माध्यमातून आंदोलनाचा मार्ग स्वीकारणार असल्याचे सांगितले.
