पितृपक्षाची भीती कायम

पुरोगामी महाराष्ट्राचा सातत्याने जप करणाऱ्या राजकीय प्रभुतींवर जुन्या रुढी व परंपराचा कसा प्रभाव आहे याचे प्रत्यंतर विधानसभा निवडणुकीसाठी अर्ज दाखल करताना पहावयास मिळत आहे. पितृपक्षाच्या धास्तीमुळे फारसे कोणी उमेदवारी अर्ज दाखल करण्यास उत्सुक नाहीत. मंगळवारचा दिवसही त्यास अपवाद ठरला नाही. चांदवड विधानसभा मतदारसंघातून केवळ एकमेव अर्ज दाखल झाला. या दिवशी १५ मतदारसंघांसाठी १२० जणांनी अर्ज नेल्यामुळे इच्छुकांची संख्या आता ४२९ वर पोहोचली आहे. शनिवारपासून विधानसभेसाठी अर्ज भरण्यास सुरूवात झाली असून अर्ज दाखल करण्याची २७ सप्टेंबर ही अंतीम तारीख आहे. बुधवापर्यंत पितृपक्ष असल्याने बहुतेकांनी अर्ज दाखल करण्यास घट स्थापनेचा मुहूर्त निवडला आहे. मागील तीन दिवसात केवळ चार जणांनी अर्ज दाखल केले आहेत. मंगळवारी १५ मतदारसंघासाठी १२० इच्छुकांनी अर्ज नेले. त्यात देवळालीसाठी ३२, नाशिक पुर्व ३, नाशिक पश्चिम ६, नाशिक मध्य ४, इगतपुरी ५, दिंडोरी ४, निफाड २, सिन्नर ११, येवला ७, चांदवड १५, कळवण १, बागलाण ६, मालेगाव बाह्य ९, मालेगाव मध्य ६ आणि नांदगाव ९ इच्छुकांचा समावेश आहे. तीन दिवसात अर्ज नेणाऱ्यांची संख्या एकूण ४२९ झाली आहे. इच्छुकांची सर्वाधिक संख्या नाशिक पूर्व मध्ये ६९ असून सर्वात कमी म्हणजे ५ कळवणमध्ये आहे. देवळालीसाठी १५, नाशिक मध्य ३५, नाशिक पश्चिमसाठी ३१ इच्छुकांनी अर्ज नेले आहेत. अर्ज नेणाऱ्यांचे प्रमाण मोठे असले तरी ते दाखल करणाऱ्यांचे प्रमाण अतिशय कमी आहे. मंगळवारी चांदवड मतदारसंघातून एकमेव अर्ज दाखल झाला. पितृपक्षात केवळ चार उमेदवारांनी अर्ज दाखल केले आहे.