महाराष्ट्र राज्य माध्यमिक व उच्च माध्यमिक शिक्षण मंडळातर्फे घेण्यात आलेल्या दहावी परीक्षेचा निकाल उद्या, १७ जूनला दुपारी १ वाजता ‘ऑनलाईन’ जाहीर करण्यात येणार आहे. दहावीच्या परीक्षेत नागपूर विभागीय मंडळातून २ लाख ५ हजार ०१६ विद्यार्थ्यांनी परीक्षा दिली असून त्यात पुनर्परीक्षार्थी २८ हजार २०८ तर, नियमित विद्यार्थी १ लाख ७६ हजार ८०८ आहेत.
नियमित आणि पुनर्परीक्षार्थी भंडाऱ्यातून २६ हजार ६६५, चंद्रपूरमधून ३६ हजार ९१७, नागपूरमधून ८० हजार ९५७, नागपूर ग्रामीण ३४ हजार ७७७, वध्र्यामधून २३ हजार ५१६, गडचिरोलीमधून १७ हजार ४४८, तर गोंदियामधून २५ हजार ८४३ विद्यार्थ्यांंनी परीक्षा दिली. बारावीत ग्रामीण भागातील अनेक विद्यार्थ्यांंना ऑनलाईनची सुविधा उपलब्ध झाली नसल्यामुळे निकालापासून वंचित राहावे लागले होते. मात्र, दहावीच्या निकाल ऑनलाईन पद्धतीने पाहण्यासाठी सर्व ग्रामीण भागातील ग्रामपंचायत पासून विविध शासकीय कार्यालयात व शाळांमध्ये व्यवस्था करण्यात आली आहे. त्यामुळे ग्रामीण भागातील विद्यार्थ्यांंना अडचण जाणार नाही. इंटरनेटच्या माध्यमातून गुणपत्रिकेची प्रत काढण्याची मुभा देण्यात आली असली, तरी ती ग्राह्य़ धरण्यात येणार नाही. गुणपडताळणी, फेरमूल्यांकन, श्रेणीसुधार आदी कार्यवाहीसाठी मूळ गुणपत्रिकेच्या छायाप्रतीसह दहा दिवसांच्या आत विभागीय मंडळाकडे अर्ज करता येईल.
विभागनिहाय हेल्पलाईन
मंडळातर्फे निकालासंदर्भातील समस्या, शंका सोडविण्यासाठी विभागनिहाय हेल्पलाईन सुरू करण्यात येणार आहेत. कमी गुण मिळालेल्या व अनुत्तीर्ण विद्यार्थ्यांंना हेल्पलाईनवर निकाल सांगण्यासाठी दोन समुपदेशकांची नियुक्ती करण्यात आली आहे. गुणपत्रिकांचे वितरण होईपर्यंत सकाळी १० ते सायंकाळी ७ वाजेपर्यंत हेल्पलाईनवर विद्यार्थ्यांंना समुपदेशन करण्यात येणार आहे. अधिक माहितीसाठी नागपूर विभागाचा हेल्पलाईनचा दूरध्वनी क्रमांक ०७१२- २५६५७२ आणि २५६५२९६ व अमरावती ०७२१- २६६२६०८, २६६२६४७ असा आहे.
