ग्रामपंचायतींमध्ये शेकाप महायुतीसोबत?

लोकसभेच्या निवडणुकीचे बिगूल वाजल्यानंतर शेकापने शिवसेना महायुतीशी काडीमोड घेतला. मात्र स्थानिक स्वराज्य संस्थेच्या निवडणुकीत सत्ता ताब्यात ठेवण्यासाठी पनवेलमध्ये याच महायुतीचे मागदर्शन स्वीकारायची दुहेरी भूमिका शेकापने घेतल्याचे फडके यांच्या विधानामुळे दिसून आले आहे. याबाबत आमदार विवेक पाटील म्हणाले की, सहा महिन्यांपूर्वी महायुतीमध्ये असताना चिपळे ग्रामपंचायतीच्या स्थानिक कार्यकर्त्यांनी ही युती केल्याने फडके यांनी हे विधान केले असल्याचे स्पष्ट केले आहे.
पनवेलच्या कर्नाळा, चिपळे, कुंडेवहाळ या ग्रामपंचायतींवर शेकापला सत्ता राखण्यात यश आले आहे. कर्नाळा ग्रामपंचायतीमध्ये १३ पैकी ११ जागांवर विजय संपादन केला. कुंडेवहाळ ग्रामपंचायतीमध्ये सर्व ९ जागा ताब्यात घेत काँग्रेसला धूळ चारण्याचे काम शेकापने केले. चिपळे ग्रामपंचायतीमध्ये शेकापचे ६ सदस्य निवडून आले. या ग्रामपंचायतीवर या अगोदर काँग्रेसची सत्ता होती. आता काँग्रेसचे ५ सदस्य निवडून आले आहेत.