वाळू माफियावर छापा, ६ आरोपी अटकेत

ग्रामीण पोलिसांनी पारशिवनी आणि मौदा पोलीस ठाण्याच्या हद्दीत नाकाबंदी करून वाळूची चोरी करणाऱ्या ५ ट्रॅक्टर व एका ट्रक चालकाला अटक करून
त्यांच्या ताब्यातून चोरीच्या वाळूसह १५ लाख ६४ हजार रुपये किमतीचा ऐवज जप्त केला. नवनियुक्त
पोलीस अधीक्षिका डॉ. आरती सिंह यांनी वाळू चोरीवर नियंत्रण आणण्यासाठी कारवाईचा धडाका सुरू केला आहे.
जिल्ह्य़ात मोठय़ा प्रमाणात वाळूची चोरी होत असल्याच्या तक्रारी ग्रामीण पोलिसांना प्राप्त होत होत्या. त्याची दखल घेऊन कारवाई करण्याचे ठरवण्यात आले. पारशिवनी पोलीस ठाण्याच्या हद्दीत येणाऱ्या नयाकुंड येथे २१ मार्चच्या रात्री पोलिसांनी नाकाबंदी केली. यावेळी ट्रॅक्टरचा (क्र. एमएच ४०/एल/८९५२) चालक
दिनेश शालिकराम कुहीटे (२०), रा. नयाकुंड व ट्रॅक्टरचा (क्र. एमएच ४०/एल/७७७४) चालक विलास बापुराव परतेकी (३०), रा. पालोरा, हे ट्रॅक्टर ट्रॉलीमध्ये
प्रत्येकी एक ब्रास वाळू चोरून नेताना आढळून आले. त्यांना रॉयल्टी व परवान्याबाबत विचारणा केली असता त्यापैकी काहीही नसल्याचे त्यांनी पोलिसांना
सांगितले. पोलिसांनी याप्रकरणी गुन्हा नोंदवून दोघांनाही अटक केली तसेच त्यांच्या ताब्यातून दोन्ही ट्रॅक्टर व वाळूसह ६ लाख २ हजार रुपये किंमतीचा ऐवज जप्त केला.
तसेच मौदा पोलिसांनी २० मार्चच्या रात्री माथनी शिवारात नाकाबंदी करून ३ ट्रॅक्टरचे चालक व एका ट्रकच्या चालकाला अटक केली. ट्रकचा (क्र.एमएच/३१/सीडी/२२५५) चालक सोमेश्वर पंढरी माकडे (३३), रा. सिल्ली, ट्रॅक्टरचा (क्र. एमपी/२०/वाय/५१४८) चालक राजेश गजानन वैद्य (२६), रा. केसलापूर, ट्रॅक्टरचा (क्र. एमएच/४०/ई/४२५५) चालक श्रीकृष्ण गोविंदा वंजारी (३०), रा. केसलापूर, ट्रॅक्टरचा (क्र. एमएच ४०/एच/५१३३) चालक अर्जुन सोमा खंडाते (३५), रा. मांगली, हे आपापल्या वाहनात एकूण ६ ब्रास वाळू चोरून नेताना आढळून आले. त्यांच्याजवळ वाळूची वाहतूक करण्याचा कोणताही परवाना नव्हता. त्यामुळे पोलिसांनी गुन्हा नोंदवून त्यांना अटक केली व त्यांच्या ताब्यातून ९ लाख ६२ हजार रुपये किमतीचा ऐवज जप्त केला.  ही कारवाई पोलीस अधीक्षक डॉ. आरती सिंह यांच्या सूचनेनुसार रामटेक विभागाचे सहायक पोलीस
अधीक्षक डी. साळुंके, पारशिवनीचे सहायक पोलीस निरीक्षक रघुवंशी, तसेच मौदाचे पोलीस निरीक्षक गायबोले, पोलीस उपनिरीक्षक बुराडे व त्यांच्या सहकाऱ्यांनी केली.
दरम्यान, सावनेर पोलीस आणि नागपुरातील खास पथकाने कारवाई करून वाळू चोरांना पकडले. यानंतर तहसीलदारांनी त्यांच्यावर दंडात्मक कारवाई केली. आजनी गावाजवळील जाम नदीच्या काठावरील वाळूची चोरी होत असल्याची माहिती सावनेर पोलिसांना मिळाली. या माहितीवरून नागपुरातील खास पथक आणि सावनेर पोलिसांनी संयुक्तपणे शुक्रवारी पहाटे पाच वाजताच्या सुमारास आजनी गावाजवळ सापळा रचला. पोलिसांना चार ट्रॅक्टरने वाळू नेली जात असल्याचे दिसून आले. त्यांना लगेच थांबवून चालकांची विचारपूस केली. ट्रॅक्टरमालकाने सांगितल्याप्रमाणे वाळू नेत असल्याचे त्यांनी पोलिसांना सांगितले. यानंतर पोलिसांनी वाळू भरलेले चारही ट्रॅक्टर पोलीस ठाण्यात आणून चालकांना तहसीलदारांच्या समोर उभे केले. तहसीलदारांनी आपल्या अधिकाराचा वापर करून चारही ट्रॅक्टर मालकावर ६ हजार ४०० रुपये दंड ठोठावला. दंडाची रक्कम भरल्यानंतर चालकांना सोडून देण्यात आल्याची माहिती सावनेर ठाण्याचे सहायक पोलीस निरीक्षक राठोड यांनी दिली.