कल्याण पश्चिम रेल्वे स्थानकातील स्कायवॉकला फेरीवाल्यांचा विळखा पडला आहे. सकाळी आठ ते रात्री बारा वाजेपर्यंत फेरीवाले याठिकाणी तळ ठोकून असतात. त्यामुळे प्रवाशांना या भागातून चालणे अवघड झाले आहे. महापालिका, पोलीस तसेच रेल्वे अधिकारी यांच्या संगनमताने फेरीवाले हा व्यवसाय करीत असल्याचे बोलले जाते.
पालिकेच्या ‘क’ प्रभागाच्या अंतर्गत हा विभाग येतो. या प्रभागातील फेरीवाला हटाव पथकाकडून स्कॉयवॉक अडवून बसणाऱ्या फेरीवाल्यांकडे कानाडोळा केला जात असल्याचे चित्र आहे. कल्याण रेल्वे स्थानक परिसरात दररोज ये-जा करणाऱ्या अनेक नागरिकांनी याविरोधात महापालिका तसेच रेल्वे पोलीस ठाण्यात तक्रारी केल्या आहेत. तरीही स्कॉयवॉक अडवून बसणाऱ्या फेरीवाल्यांच्या संख्येत दिवसागणिक वाढच होत असल्याचे चित्र दिसत आहे. कल्याण स्थानक अडवून बसणारे बहुतांश फेरीवाले भायखळा, मुंब्रा, अंधेरी, कुर्ला येथून आलेले आहेत. प्लॅस्टिक वस्तू, पुस्तके, कपडे, चप्पल विक्रीचे व्यवसाय याठिकाणी सुरू असतात. त्यामुळे स्कायवॉकच्या सहा फूट रुंदीच्या पदमार्गावरून चालताना प्रत्यक्षात दोन फुटांचा रस्ता प्रवाशांना ये-जा करण्यास उपलब्ध होत आहे. हे फेरीवाले म्हणजे काही महापालिकेच्या ‘क’ प्रभाग कार्यालयातील काही कर्मचारी, रेल्वे पोलीस, रेल्वे सुरक्षा दलातील कर्मचाऱ्यांसाठी दुभती गाय असल्याचे बोलले जाते. महापालिका आयुक्त श्यामसुंदर पाटील हे प्रभारी असले तरी माजी आयुक्त शंकर भिसे यांच्यापेक्षा त्यांनी गेल्या काही दिवसांपासून कामाचा धडाका लावला आहे.
आम आदमीचा झटका
डोंबिवली पूर्व बाजूकडील स्कायवॉकवर अनेक फेरीवाले गेल्या वर्षांपासून रेल्वे स्थानकातील पुलावर रस्ता अडवून व्यवसाय करीत आहेत. रेल्वे पोलीस, अधिकारी यांच्या संगनमताने हा व्यवसाय सुरू आहे. आम आदमी पक्षाचे प्रशांत रेडिज यांनी रेल्वे स्थानकात रस्ते अडवून बसणाऱ्या फेरीवाल्यांची, या फेरीवाल्यांना पाठीशी घालणाऱ्या डोंबिवली रेल्वे स्थानकाचे स्टेशन मास्तर व पोलीस अधिकाऱ्यांची थेट मध्य रेल्वेच्या महाव्यवस्थापकांकडे तक्रार केली आहे. त्यामुळे मागील दोन दिवसापासून रेल्वे स्थानकातील फेरीवाले महापालिकेच्या स्कायवॉकवर रस्ते अडवून बसू लागले आहेत. आम आदमीच्या कार्यकर्त्यांनी या फेरीवाल्यांना रेल्वे पोलिसांनी पूर्णपणे हटवले नाही तर उपोषण करण्याचा इशारा दिला आहे. पालिकेचे फेरीवाला हटाव पथक व रेल्वे सुरक्षा दलाचे जवान या फेरीवाल्यांचा काय बंदोबस्त करतात याकडे नागरिकांचे लक्ष लागले आहे.
