नागपूरमधील लघुसिंचनाचा तीन कोटीचा निधी पडून

विदर्भातील सिंचन क्षेत्रात वाढ व्हावी या उद्देशाने शेतक ऱ्यांना सिंचनाच्या सोयीयुविधा उपलब्ध करून दिल्या जात आहे. लघुसिंचन विभागाने ५ वर्षांंचा ३ हजार ५०० कोटींचा आराखडा तयार केला आहे. शासनाकडून यासाठी निधी उपलब्ध होत आहे, परंतु नागपूर जिल्ह्य़ातील लघुसिंचनाचा तीन कोटींचा निधी अखर्चित असल्याचे चित्र आहे.
जिल्ह्य़ातील लघुसिंचन विभागासाठी २०१३-१४ या वर्षांसाठी ६ कोटी १४ लाखाचा नितव्यय मंजूर करण्यात आला आहे. जिल्हा परिषदेच्या लघु सिंचन विभागाने ७ कोटींच्या निधीची मागणी शासनाकडे केली; परंतु ३ कोटी २० लाखांचा निधी मिळाला. यातील जेमतेम २४ लाखांचा निधी अखर्चित आहे. म्हणजेच ६ कोटींपैकी जेमतेम २४ लाखांचा खर्च करण्यात आला.
लघुसिंचनावर खर्च होत नसल्याने जिल्ह्य़ातील सिंचनक्षेत्रात अपेक्षित वाढ होत नसल्याचे चित्र आहे. जिल्ह्य़ातील कोल्हापुरी बंधारे, लघुपाटबंधारे, मामातलाव दुरुस्तीसाठी १ कोटी  २३ लाखाचा निधी मंजूर करण्यात आला. त्याचप्रमाणे माडांतर्गत याच कामासाठी १ कोटी ७१ लाखांचा नितव्यय मंजूर आहे. परंतु हा निधी अप्राप्त आहे. लघु पाटबंधारे कोल्हापुरी बंधारे, मामा तलाव यासाठी ३ कोटी २० लाखाचा निधी प्राप्त झाला आहे. यातील जेमतेम २४ लाख खर्च करण्यात आले.
विदर्भ सिंचन विकास पाणलोट व्यवस्थापन कार्यक्रम व आदर्श गाव योजनेचा आराखडा तयार करण्यात आला आहे. २०१२-१३ या वर्षांत ३०० कोटीपैकी २७० कोटींचा निधी खर्च करण्यात आल्याचा दावा लघुसिंचन विभागकडून केला जात आहे. नागपूर जिल्ह्य़ाला अपेक्षित निधी मिळालेला नाही. जो मिळाला तोही खर्च होत नसल्याचे चित्र आहे.