ठाण्यातील पाणी मीटरला निवडणुकीपर्यंत कुलुप

मीटरचा गुंता सुटेना..
ठाणे शहरात सध्या एक लाख ४० हजार ग्राहकांना पाण्याचे बिल फ्ॅलट रेटने आकारले जाते. काही वसाहतींमध्ये पाण्याच्या तीन-चार जोडण्या देण्यात आल्या आहेत. या जोडण्यांना पाण्याचे मीटर नाहीत. नव्या योजनेनुसार या जोडण्यांना तीन टप्प्यांमध्ये मीटर बसविण्याचे निश्चित करण्यात आले आहे. अभियांत्रिकी विभागाने मध्यंतरी ठाणे महापालिका हद्दीत सुमारे ९२ हजार ४९ पाणी मीटर बसविण्याचा प्रस्ताव मंजूर केला. १५ ते ३०० मिलिमीटर व्यासाच्या घरगुती तसेच व्यावसायिक जोडण्यांना मीटर बसविण्याचा प्रकल्प आखण्यात आला. यासाठी सुमारे १७१ कोटी रुपयांचे अंदाजपत्रकही तयार करण्यात आले. मात्र केंद्र सरकारने पाणी वितरण व्यवस्थेच्या सक्षमीकरणासाठी एकत्रित अशा प्रस्तावास मंजुरी दिल्याने मीटर बसविण्याच्या कामांचाही यामध्ये समावेश करण्यात आला. दरम्यान, मुंब्रा आणि घोडबंदर अशा परिसरातील सुमारे ६० हजार जोडण्यांना मीटर बसविण्याची कामे पहिल्या टप्प्यात हाती घेण्याचे निश्चित करण्यात आले आहे, अशी माहिती पाणीपुरवठा विभागातील सूत्रांनी दिली. यापैकी मुंब्रा परिसरातील निविदांची प्रक्रिया अंतिम टप्प्यात असून घोडबंदरची प्रक्रिया लवकरच उरकली जाणार असल्याचे सूत्रांनी सांगितले.

शिवसेनेचा खोडा
पाणी जोडण्यांवर लवकरात लवकर मीटर बसावेत यासाठी पाणीपुरवठा विभाग आग्रही असला तरी विधानसभा निवडणुकीनंतरच ही कामे केली जावीत, असा आग्रह सत्ताधारी शिवसेनेने धरला असल्याची माहिती विश्वसनीय सूत्रांनी दिली. घरगुती जोडण्यांना मीटर बसले की पाणी बिलात वाढ होईल, अशीच चिन्हे आहेत. याशिवाय निवडणुकीच्या काळात हा प्रकल्प राबविण्याचा जुगार अंगाशी येऊ शकतो, असे शिवसेनेतील एका मोठय़ा गटाचे म्हणणे आहे. त्यामुळे घोडबंदर परिसरातील मीटर बसविण्याची निविदा शक्यतोवर लांबणीवर जाईल, असे प्रयत्न सत्ताधाऱ्यांच्या गोटातून सुरू झाले आहेत. याविषयी सभागृह नेते नरेश म्हस्के यांच्याकडे विचारणा केली असता असा कोणताही प्रयत्न शिवसेनेकडून सुरू नाही, असे त्यांनी स्पष्ट केले. मीटर बसविण्याच्या प्रकल्पास सर्व पक्षांनी मंजुरी दिली आहे हे आपण विसरता, असेही ते म्हणाले. निविदाप्रक्रिया सुरू असल्याने ती पूर्ण होताच कामे हाती घेतली जातील, असेही त्यांनी स्पष्ट केले.