विदर्भात गेल्या सहा दिवसापासून चांगलीच कडाक्याची थंडी पडत असल्याने उबदार कपडय़ाचा आसरा घ्यावा लागत आहे. विदर्भात गेल्या चार दिवसांत तापमानदर्शक यंत्रातील पारा चांगलाच घसरला असून सकाळ आणि संध्याकाळच्या थंडीने नागरिकांमध्ये हुडहुडी भरली आहे. विदर्भात सर्वात कमी गोंदियात ८.८ आणि त्या खालोखाल नागपूरमध्ये ९.५ अंश से. तापमानाची नोंद करण्यात आली.
विदर्भातील काही जिल्ह्य़ात धुक्याचे प्रमाण अधिक वाढले आहे. नोव्हेंबरमध्ये थंडीला चांगली सुरुवात झाल्याने यंदाच्या हिवाळ्यात थंडीचा जोर वाढणार असे वाटत होते, त्यानंतर काही दिवसातच थंडीचा जोर ओसरला असताना आता पुन्हा गेल्या सहा दिवसांत पारा अतिशय घसरला असून विदर्भात थंडीने चांगलाच कहर केला आहे. गोंदिया, भंडारा,अमरावती अकोलासह नागपूरमध्ये थंडी चांगली पडत आहे. सध्या नागपूरमध्ये विधि मंडळाचे हिवाळी अधिवेशन सुरू असल्यामुळे राज्यातील विविध भागातील राज्य सरकारमधील मंत्री, नेते , प्रशासकीय अधिकारी आणि कर्मचारी आले असून तेही या थंडीचा आनंद घेत आहे. नागपूर शहरात सर्वात सर्वात कमी म्हणजे नागपूर शहरात सर्वात ९ अंश सेल्सिअस किमान तापमानाची नोंद करण्यात आली.
उपराजधानीत विधिमंडळाचे हिवाळी अधिवेशनाच्यापूर्वी थंडीने पळ काढला होता मात्र अधिवेशन सुरू होताच थंडीचा कडाका वाढला आहे. दुपारी उन्हामुळे नागरिकांना दिलासा मिळत असला तरी गेल्या पाच सहा दिवसांपासून शहरात सकाळी आणि रात्री थंडीचा कडाका जाणवायला लागल्यामुळे शहरातील विविध भागात शेकोटय़ा पेटू लागल्या आहेत. विदर्भात अकोला ११
अमरावती ११.४ , बुलढाणा ११.८, ब्रम्हपुरी १२.९ चंद्रपूर ११.२, गोंदिया ८.८ वाशीम १४ वर्धा ११.५ आणि यवतमाळ ११.४ नोंद करण्यात आली आहे.
नागपुरात मंगळवाच्या तुलनेत बुधवारी आणि गुरुवारी सकाळपासून अधिक थंडी जाणवयला लागली आहे. सकाळपासून थंडे वारे वाहू लागले आहे. उत्तर प्रदेश, मध्य प्रदेश, छत्तीसगडसह विदर्भाच्या काही भागात थंडीचा लाट कायम असून तापमान सरासरीपेक्षा खाली जात आहे. हवामान खात्याच्या अंदाजानुसार थंडीचा प्रकोप आणखी वाढणार असल्याचे सांगण्यात आले. आला थंडीचा महिना..झटपट शेकोटी पेटवा.. असे शहरवासी म्हणू लागले आहेत. अचानक वाढलेल्या थंडीमुळे आजारांचे प्रमाण वाढले आहे. शहरातील खाजगी आणि शासकीय रुग्णालयांत रुग्णांची गर्दी होते आहे. दमा, ब्राँकॉयटीस या आजारांबरोबरच तापाचे रुग्ण वाढले आहेत. त्यातच शहरातील विविध भागात असलेल्या अस्वच्छतेमुळे आरोग्याच्या समस्या आणखी वाढल्या आहेत. थंडीचा जोर वाढू लागल्याने ‘मॉर्निग वॉक ’ला जाणाऱ्यांच्या संख्येत घट झाली असून सकाळी शाळेत जाणाऱ्या मुलांनाही वाढत्या थंडीचा फ टका बसू लागला आहे. उबदार कपडय़ाच्या दुकानात ग्राहकांची गर्दी वाढू लागली असून वेगवेगळ्या पद्धतीचे स्वेटर, शाल, टोप्या, हातमोजे, कानटोपी आदींची खरेदी केली जात आहे. गेल्या पाच सहा दिवसापासून उबदार कपडय़ांची विक्री वाढली आहे.
