भरधाव असलेला ट्रक रस्त्यांच्या खाली उतरून अंगणात सडा टाकत असलेल्या महिलेल्या धडकल्याने ती जागीच चिरडून ठार झाल्याची घटना रविवारी सकाळी येथून जवळच किन्ही येथे घडली. या अपघातात अंगणात उभी असलेल्या दुचाकी व बलगाडीचाही चुराडा झाला.
संगीता दामोधर गायधने (३०) असे मृत महिलेचे नाव आहे. परळी वैजनाथ (जि.बीड) येथून शालेय पोषण आहाराचे तेलाचे डबे घेऊन यवतमाळकडे येत असलेला आयशर ट्रकच्या (क्रमांक एम.एच.४४/८३०५) चालकाचे नियंत्रण सुटल्याने आर्णी रोडवरील किन्ही गावात राहत असलेली संगीताच्या अंगणात उतरला. ती पहाटे सडा टाकत असल्याने ट्रकखाली चिरडून तिचा जागीच मृत्यू झाला, तर अंगणात उभी असलेल्या दुचाकी तसेच बलगाडीचा चुरा झाला.
घटनेची माहिती कळताच ग्रामस्थांनी धाव घेऊन ट्रकचालक मोतीराम चाटे (३५,रा.परळी) याला पकडून चोप दिला. संजय गायधने यांच्या तक्रारीवरून यवतमाळ ग्रामीण पोलिसांनी ट्रकचालकाविरुद्ध गुन्हा दाखल केला.