जगभरातील मारधाडपटांचे प्रतिक म्हणून ओळखल्या जाणाऱ्या ‘रॅम्बो’चा भारतीय अवतार नुकताच आला आहे. ‘कमांडो’ या चित्रपटातून नायक म्हणून रुपेरी पडद्यावर आलेल्या विद्युत जमवालने यापुढेही ‘कमांडो’सारख्या मारधाडपटांवर भर देण्याचा निर्णय घेतला आहे. आपल्या अ‍ॅक्शन सीन्समुळे बॉलिवूडमध्ये पुन्हा एकदा अ‍ॅक्शन सीन्सची लाट आली, तर आपल्याला खूप आवडेल. त्या अर्थाने बॉलिवूडमधील ‘रॅम्बो’ बनण्याची आपली तयारी आहे, अशी दिलखुलास कबुली विद्युतने ‘रविवार वृत्तांत’शी बोलताना दिली.
‘कमाण्डो’ बघितलेल्या प्रत्येकालाच त्यातील अ‍ॅक्शन सीन्स आवडले. आतापर्यंत बॉलिवूडमध्ये अशा प्रकारचे अ‍ॅक्शन सीन्स झाले नव्हते, असे विद्युतलाही अनेकांनी सांगितले. विशेष म्हणजे विद्युतही स्वत:वर खूप खुश आहे. ‘फोर्स’मध्ये जॉन अब्राहमसमोर खलनायक म्हणून उभा राहणाऱ्या विद्युतला नायक म्हणून काम करताना खूपच चांगला अनुभव आल्याचे त्याने सांगितले. ‘फोर्स’च्या आधी आपण तो चित्रपट मिळावा म्हणून तयारी करत होतो. आपण गेली सात ते आठ वर्षे मुंबईत राहत आहोत. मुंबईत आल्यापासूनच आपण शरीरसौष्ठवाचे प्रशिक्षण घेत असून मॉडेलिंग क्षेत्रातही कार्यरत आहोत. त्यामुळे या शहरात कामाची चणचण कधीच भासली नाही, असेही विद्युतने स्पष्ट केले.
यापुढे विद्युतला फक्त मारधाडपट करण्यात स्वारस्य आहे. चित्रपटाचा पोत कोणताही असला, तरी त्यात अ‍ॅक्शन हवीच. आपण इतरही भावभावना उत्तमरित्या सादर करू शकतो, पण तरीही अ‍ॅक्शन हे आपले पहिले प्रेम आहे, असेही तो सांगतो. ‘अ‍ॅक्शन-रोमान्स’, ‘अ‍ॅक्शन-कॉमेडी’, ‘अ‍ॅक्शन-ड्रामा’ अशी कॉम्बिनेशन्स असलेले चित्रपटच आपण यापुढे करणार असून अ‍ॅक्शन हा यातील स्थायीभाव असेल, असे त्यानेच ‘रविवार वृत्तांत’शी बोलताना सांगितले. सध्या मोठय़ा पडद्यावर वावरणारा विद्युत छोटय़ा पडद्याच्याही प्रचंड प्रेमात आहे. सीआयडी या कार्यक्रमात आपल्या चित्रपटाच्या प्रमोशनसाठी तो येऊन गेला. मात्र पुढेही आपण नक्कीच छोटय़ा पडद्यावर काम करू, असे त्याने सांगितले.
