सर एव्हर्टन वीक्स

पण या तिघांपैकी वीक्स हे नि:संशय अधिक गुणवान फलंदाज. ४८ कसोटी सामन्यांमध्ये ५८.६१च्या सरासरीसह ४४५५ धावा, ज्यात १५ शतके आणि १९ अर्धशतकांचा समावेश. ती सरासरी किमान २०हून अधिक कसोटी सामने खेळलेल्या फलंदाजांच्या क्रमवारीत सातवी. पण त्याहीपेक्षा थक्क करणारी कामगिरी वीक्स यांच्या नावावर नोंदवली गेली – सलग ५ कसोटी शतकांची. यांतील पहिले इंग्लंडविरुद्ध, उर्वरित चार भारताविरुद्ध भारतातच. ही शतके सहा असती, पण मद्रासमध्ये आपल्याला संशयास्पदरीत्या धावबाद ठरवले गेले, अशी तक्रार ते अलीकडेपर्यंत करत असत. अर्थात त्यात कधीच कोणती कटुता नसे. उत्तम तंदुरुस्ती आणि उत्तम मानसिक स्वास्थ्य लाभलेला हा रांगडा कॅरेबियन गडी. गरिबीत जन्माला आला. सुरुवातीला एका क्रिकेट क्लबमध्ये किरकोळ काम करण्यासाठी सोडले जायचे, पण खेळता येत नव्हते. कारण क्लब केवळ गोऱ्यांसाठी राखीव होता. एव्हर्टन वीक्स पिकविक या गावात फुटबॉल आणि क्रिकेट एकाच वेळी खेळू लागले. आजूबाजूच्या वस्तीतील खिडक्यांच्या काचा फुटू नयेत यासाठी जमिनीलगत फटके मारायची सवय जडली, ती कायमचीच. कारकीर्दीत त्यांनी केवळ एकच षटकार लगावला, कारण त्याची फारशी गरजच भासली नाही. तरीदेखील कसोटी इतिहासात सर्वात कमी १२ डावांमध्ये पहिल्या हजार धावा जमवणारे ते एकमेव. सतत पोहण्याची सवय. विनोदी आणि आनंदी व्यक्तिमत्त्व. शिवाय स्वत:ची कामे स्वत:च करण्याची शिस्त. क्रिकेटबरोबरच ब्रिजमध्येही पारंगत. तरीही गोतावळा जमवून क्रिकेटचे सामने पाहण्याची सवय. त्यामुळे दीर्घायुषी, रसरशीतही राहिले. एकदा बार्बेडोसला आलेल्या इयन चॅपेलना एक पार्टी संपवून मध्यरात्री त्यांच्या मुक्कामी जायचे होते. त्या वेळी हातात बीअरचा ग्लास असूनही वीक्स म्हणाले, ‘‘मी सोडतो तुम्हाला.’’ चॅपेल यांनी बजावले, ‘‘ब्रेथलायझरचे काय कराल?’’ वीक्स मिष्कीलपणे उत्तरले- ‘‘आम्ही सभ्य आहोत. असल्या वाईट सवयी आम्हाला नाहीत!’’

आणखी वाचा

Ind vs Aus: भारताविरुद्ध ऑस्ट्रेलियाने दिली ‘या’ नव्या खेळाडूला संधी; पर्थ कसोटीसाठी केला संघ जाहीर

Devendra Fadnavis Income : उपमुख्यमंत्र्यांची एकूण संपत्ती किती?…

अपयशानंतर स्वत:च्याच क्षमतेवर प्रश्न! कर्णधार, प्रशिक्षकांच्या पाठिंब्यामुळे बळ; विक्रमवीर सॅमसनची भावना

समोरच्या बाकावरून : आता निवडणुकीचे ट्रम्प प्रारूप?

Sanju Samson : संजू सॅमसनने धोनीला मागे टाकत केला खास पराक्रम, टी-२० क्रिकेटमध्ये ‘ही’ कामगिरी करणारा ठरला सातवा भारतीय

Suryakumar Yadav : संजू सॅमसनला नडणाऱ्या मार्को यान्सनशी भिडला सूर्या, लाइव्ह सामन्यातील वादावादीचा VIDEO व्हायरल

अग्रलेख: ‘तो’ आणि ‘त्या’!

Sanju Samson Century: संजू सॅमसनने शतकासह घडवला इतिहास, टी-२० इतिहासात ‘ही’ कामगिरी करणारा ठरला पहिलाच भारतीय खेळाडू