IAS Pari Bishnoi: UPSC म्हणजेच केंद्रीय लोकसेवा आयोगाची परीक्षा उत्तीर्ण करणं हे सर्वात कठीण मानलं जातं. या परीक्षेत पास होण्यासाठी उत्तम शिकवणीच्या शोधात अनेक विद्यार्थी आपल्या घरापासून लांब, मोठ्या शहरांत येऊन राहतात. परंतु, या स्पर्धात्मक जगात पहिल्याच प्रयत्नात सगळ्यांनाच यश मिळेल असं नाही.
कोण आहेत परी बिश्नोई? (Who is Pari Bishnoi)
नागरी सेवक बनून देशाची सेवा करण्याची संधी अत्यंत कमी लोकांना मिळते, अशीच संधी आयएएस परी बिश्नोई यांना मिळाली. राजस्थानमधील बिकानेर येथे राहणाऱ्या परी बिश्नोई सध्या चर्चेत आहेत. परी यांचे वडील वकील आहेत, तर त्यांची आई जीआरपीमध्ये पोलिस अधिकारी म्हणून काम करते.
हेही वाचा… संसाराची कसरत आणि स्वप्नांचा पाठलाग, IPS तनुश्रीने केलं लग्नानंतर स्वप्न साकार
परी बिश्नोई यांनी अजमेर येथील सेंट मेरी कॉन्व्हेंट स्कूलमध्ये शिक्षण घेतलं. त्यानंतर दिल्ली विद्यापीठाच्या इंद्रप्रस्थ कॉलेज फॉर वुमन्समध्ये बॅचलरचा अभ्यास करण्यासाठी त्या दिल्लीला गेल्या. तसंच त्यांनी राज्यशास्त्रातील पदव्युत्तर शिक्षणासाठी अजमेरच्या एमडीएस विद्यापीठात प्रवेश घेतला.
…अशी केली IASची तयारी
त्यांच्या पदवीनंतर परी बिश्नोई यांनी आयएएस (IAS) परीक्षा उत्तीर्ण करण्याचा विचार सुरू केला. या परीक्षेचा अभ्यास करण्यासाठी त्यांनी त्यांचा फोन वापरणं पूर्णपणे बंद केलं आणि त्यांचे सर्व सोशल मीडिया अकाउंट्स डिलिट केले.
यूपीएससी परीक्षा उत्तीर्ण होणे हाच त्यांचा ध्यास होता. पहिल्या दोन्ही प्रयत्नात अपयश हाती लागल्यानंतर २०१९ मध्ये तिसऱ्या प्रयत्नात परी यांनी यूपीएससी परीक्षा उत्तीर्ण केली. त्या संपूर्ण भारतात ३० व्या (AIR) रॅंकला होत्या.
परी बिश्नोई सध्या IAS आहेत, ज्या सिक्कीममधील गंगटोक येथे उपविभागीय अधिकारी (Sub Divisional Officer) म्हणून कार्यरत आहेत. त्यांनी यापूर्वी भारत सरकारच्या पेट्रोलियम आणि गॅस मंत्रालयात (Ministry of Petroleum and Gas) सहाय्यक सचिव म्हणून काम केले होते.
परी बिश्नोई यांचे लग्न आदमपूर, हिसार येथे जन्मलेल्या हरियाणातील सर्वात तरुण विधानसभा सदस्य भव्य बिश्नोईशी झाले आहे. भव्य हे हरियाणाचे माजी मुख्यमंत्री भजन लाल यांचे नातू आणि भाजपा नेते कुलदीप बिश्नोई यांचे सुपुत्र आहेत.
