मायक्रोमान्स… खास नात्यासाठी खास गोष्ट!

यामागचं महत्त्वाचं कारण म्हणजे महिला पुरुषांपेक्षा जास्त भावनाशील असतात. त्या कल्पनाविलासात जास्त रमतात असंही म्हटलं जातं. त्यामुळेच रोमँटिक कादंबऱ्या वाचण्याचं, रोमँटिक सिनेमे पाहण्याचं महिलांचं प्रमाणही पुरूषांपेक्षा जास्त आहे. रोमान्सची कमतरता असणं हे नात्यातलं मोठं आव्हान असल्याचं मत ३४.८% सिंगल महिलांनी या सर्वेक्षणातून व्यक्त केलं आहे. जवळपास ५०.४% सिंगल महिलांना त्यांच्या डेटिंग आयुष्यात थोडा जास्त रोमान्स असावा असं वाटतं असं सर्वेक्षणात म्हटलं आहे.

आता मायोक्रोमॅन्स म्हणजे काय? तर यासाठी काही खूप खर्च करावा लागत नाही. तुमच्या छोट्या गोष्टींमधून तुम्ही जोडीदाराबद्दल प्रेम व्यक्त करणं. आवडीची प्लेलिस्ट म्हणजेच गाणी लावणं, व्हॉट्सअपवर प्रेमाची खूण असलेल्या इमोजी पाठवणं, सहज एखादा फोन करणं, रोमँटिक मेसेज पाठवणं हे तर यामध्ये येतंच. पण बायको किंवा जोडीदार कामात असताना तिला मदत करणं, प्रेमानं संवाद साधणं अशा गोष्टींमुळे महिला आपल्या जोडीदाराच्या जास्त जवळ येतात. हे काही क्षण फक्त दोघांचेच असतात. त्यामुळे ते अगदी खास असतात. त्यासाठी सोशल मीडियावर हॅशटॅग तयार करून जगाला दाखवण्याचीही गरज नसते. अशा रोजच्या क्षणांमधून फुलत असलेलं प्रेम जास्त टिकतं असं म्हटलं जातं. हे प्रेम जास्त काळ टिकतं असा दावा केला जातो. याचं कारण म्हणजे या प्रेमात दिखावा नसतो. एकमेकांना समजून घेऊन जोडीदाराच्या आवडीच्या गोष्टी मनापासून केल्या जातात, त्यामुळे अशा नात्यात ब्रेकअपची शक्यताही कमी असते.

हल्ली प्रत्येकाचंच आयुष्य तणावपूर्ण झालं आहे. नोकरीच्या ठिकाणी धावपळ, प्रचंड स्पर्धा, ट्रॅफिकमध्ये जाणारा वेळ, कौटुंबिक जबाबदाऱ्या अशा चक्रामध्ये सगळेजण अडकलेत. नातं तर फुलवण्यासाठी वेळ मिळत नाही. सुट्टीअभावी, जबाबदाऱ्या, आर्थिक परिस्थिती अशा कारणांमुळे इच्छा असूनही जोडीदाराबरोबर रोमान्स करता येत नाही. पण मायक्रोमान्ससाठी तुम्हाला वेगळा वेळ काढावा लागत नाही, पैसेही खर्च करावे लागत नाही. एखाद्या वेळेस ऑफिसमधून सुटल्यावर एखाद्या टपरीवर घेतलेला चहाही या नात्याची रंगत वाढवतो. कामाचा कितीही ताण असू दे जोडीदाराच्या आवडीचं गाणं लावलंत, एक कप गरमागरम कॉफी/चहा किंवा आवडीचं खाणं समोर ठेवलंत तर तिच्या / त्याच्या चेहऱ्यावर दिसणारा आनंद तो थकवा दूर करतो. Micromance मध्ये आपला जोडीदार आपल्याकडे आवर्जून लक्ष देत आहे असा विश्वास निर्माण होतो. त्यामुळे एकमेकांबरोबर प्रत्येक गोष्ट शेअर केली जाते. अशा नात्यांमध्ये लपवाछपवी नसते, त्यामुळे ही नाती जास्त टिकतात.

या सर्वेक्षणातून जेन Z बद्दल एक महत्त्वाची गोष्ट समोर आली आहे. नात्यांमध्ये हास्यविनोद महत्त्वाची भूमिका बजावतो असं जेन Z मधील ५१.३% सिंगल भारतीयांना वाटतं. त्यामुळे एखादं परफेक्ट मीम किंवा ‘देसी पॅरेंट’वर लिहिलेला जोक हा एखाद्या प्रेमपत्राइतकीच महत्त्वाची भूमिका बजावतो. त्यामुळे तुम्ही सिंगल असाल किंवा तुमचं लग्न झालेलं असेल तरीही ही गोष्ट नक्की लक्षात ठेवा. डायमंड रिंग, कँडल लाईट डिनर, एखाद्या छानशा ठिकाणी घालवलेली सुट्टी या गोष्टी कदाचित तुमच्या जोडीदाराला अपेक्षित नसतीलही. शेवटी प्रेम म्हणजे एकमेकांच्या आनंदाच्या/आवडीच्या गोष्टी करणं. तो आनंद जर अशा साध्या सोप्या गोष्टींमध्ये सामावला असेल तर रोजच्या जगण्यातले चार क्षण फक्त तुमच्या जोडीदारासाठी जगा, मग बघा… तुमच्या नात्यातला रोजचा दिवस व्हॅलेंटाईन डे होऊन जाईल!