Open Letter : तुझा जीव कसा कळवळला नाही? आईचे तुकडे करणाऱ्या रिंपलला खुलं पत्र

मुंबईतील लालबाग परिसरात २३-२४ वर्षांच्या रिंपल जैन या मुलीने आई वीणा जैन यांची हत्या केली. त्यानंतर मृतदेहाचे तुकडे केले. ते तुकडे तीन महिने घरातच ठेवले होते. या मुलीला पोलिसांनी अटक केली आहे, असे त्या बातमीच्या पहिल्या परिच्छेदात लिहिले होते. त्यानंतर पूर्ण बातमी वाचली आणि दोन मिनिटे शांत बसले. ती बातमी वाचून काय बोलावे, काय प्रतिक्रिया द्यावी हेच मला कळत नव्हते. पण या घटनेनंतर मन हेलावून गेले आणि एक सर्वसामान्य मुलगी म्हणून, आईचे तुकडे करणाऱ्या त्या मुलीला विविध प्रश्न विचारावेसे वाटले. आईच्या मृतदेहाचे एखाद्या निर्दयी कसायाप्रमाणे तुकडे करताना तुला काहीच कसे वाटले नाही? तू कधीतरी धडपडली असशीलच की, तेव्हा तिने केलेल्या मलमपट्टीचीही आठवण तुला झाली नाही का?