Aashka Goradia Renee Cosmetics : एका क्षेत्रात यशस्वी करिअर केल्यानंतर ते क्षेत्र मागे सोडून दुसऱ्या क्षेत्रात तितक्याच दिमाखात यशस्वी होणं सोपं नसतं. पण आशका गोराडियाने हे करून दाखवलंय. टीव्ही मालिकांमधून घराघरात पोहोचलेल्या आशकाने करिअर ऐन भरात आलेले असताना अभिनय क्षेत्र सोडले अन् सौंदर्य प्रसाधनाचा व्यवसाय सुरू केला. तिचा हाच व्यवसाय आता जवळपास ८३० कोटी रुपयांचा बनला आहे. २०२० मध्ये आशका गोराडियाने तिचा कॉलेजचा मित्र आशुतोष वलानी आणि प्रियांक शाह यांच्यासह रेनी कॉस्मेटिक्सची स्थापना केली. यांच्या कंपनीने फार कमी वेळात भरारी घेतली. सौंदर्य प्रसाधन उत्पादनांची विस्तृत श्रेणी या कंपनीने लॉन्च केली. कंपनीने अवघ्या दोन वर्षांत ८३४ कोटी रुपयांचा व्यवसाय केला. अहमदाबाद येथे मुख्यालय असलेल्या रेनी कॉम्सेटिक्सने उल्लेखनीय यश मिळवले आहे. डिसेंबर २०२२ मध्ये कंपनीने २५ दशलक्ष डॉलर्स निधी उभारला. त्यानतंर १०० दशलक्ष डॉलर्सपर्यंत (८३० कोटी) याचं मूल्य वाढत गेलं. कंपनीची वैविध्यपूर्ण उत्पादनांमध्ये २०० हून अधिक वस्तूंचा समावेश आहे. अॅमेझॉन, फ्लिपकार्ट, नायका आणि मिंत्रासारख्या प्रमुख ई-कॉमर्स प्लॅटफॉर्मवर आणि ६५० हून अधिक स्टोअर्समध्ये ही उत्पादने उपलब्ध असतात. हेही वाचा >> Who is Mohana Singh : घरातूनच लढण्याचं बाळकडू अन् आकाशी झेप घेण्याचं स्वप्न; मोहना सिंग यांची यशस्वी भरारी! उत्पादनांचं मार्केटिंग आणि सेलिंगच्या कामात आशका गोराडिया महत्त्वपूर्ण भूमिका बजावते. तर तिचे सहसंस्थापक वित्त ऑपरेशन्स आणि वितरणावर देखरेख करतात. कंपनी आर्थिक वर्ष २०२४ साठी ४०० कोटी रुपयांची कमाई करणार आहे. आशकाने तिच्या ब्रँडच्या पहिल्या उत्पदानांना अभिनेत्री जुही परमार, मौनी रॉय आणि अबीगेल जैन यांची नावे दिली होती. View this post on Instagram A post shared by Aashka Goradia Goble (@aashkagoradia) आशका गोरडियाने कोणत्या मालिकांमध्ये केलंय काम आशका गोराडिया एक प्रसिद्ध टीव्ही स्टार होती. तिने २००२ मध्ये अचानक ३७ साल बाद या शोमधून अभिनय क्षेत्रात पदार्पण केले आणि कुसुम कुमुदच्या भूमिकेसाठी तिला प्रसिद्धी मिळाली. अकेला, सिंदूर तेरे नाम का, मेरे अपने आणि विरुद्ध सारख्या इतर लोकप्रिय मालिकांमध्ये ती दिसली. २०१९ मध्ये दयान या शोमध्ये तिची शेवटची प्रमुख भूमिका होती. २०१८ मध्ये तिने नाकाची सर्जरी केली होती. यावरून तिला टीकेचा सामना करावा लागला होता. त्यामुळे तिने अभिनय क्षेत्र सोडून व्यवसायात उतरण्याचा निर्णय घेतला होता. २०१९ पर्यंत आशका अभिनय, योग आणि फिटनेससाठी ओळखली जात होती. त्यानंतर २०२० मध्ये तिने रेनी कॉस्मेटिक्सवर लक्षकेंद्रित केले. २०१७ मध्ये आशका गोरडियाने अमेरिकन व्यवसायिक ब्रेंट गोबल याच्याशी लग्न केलं. ऑक्टोबर २०२३ मध्ये तिला एक मुलगाही झाला.
