मॉर्ने मॉर्केलच्या त्या उसळत्या चेंडूला सीमारेषेबाहेर भिरकावण्याचा कुमार संगकाराचा प्रयत्न फसला आणि थर्डमॅनला डेव्हिड मिलरच्या हाती चेंडू विसावला.. त्यासह एक गौरवशाली प्रवासही संपुष्टात आला.. संगकारा बाद होऊन परतत होता त्या वेळी जोरदार पावसाला सुरुवात झाली. जणू या महान खेळाडूच्या निवृत्तीला पावसानेही सलाम ठोकला.
श्रीलंका क्रिकेटरूपी रथाची दोन चाके असणाऱ्या संगकारा आणि महेला जयवर्धने यांनी यंदाचा विश्वचषक शेवटचा असणार असल्याचे आधीच जाहीर केले होते. मोक्याच्या क्षणी कच खाणाऱ्या दक्षिण आफ्रिकेवर मात करत श्रीलंका आगेकूच करेल अशी शक्यता होती. मात्र दक्षिण आफ्रिकेच्या जबरदस्त सांघिक खेळासमोर श्रीलंकेच्या संघाने नांगी टाकली आणि या जोडगोळीच्या प्रवासाला अचानक खीळ बसली.
४०४ एकदिवसीय सामन्यांत १४,२३४ धावा नावावर असणाऱ्या संगकाराचा आधुनिक क्रिकेटमधील महान खेळाडूंच्या मांदियाळीत समावेश होतो. शेवटच्या विश्वचषकात चार सलग सामन्यांत चार शतके झळकावत संगकाराने अनोखा विक्रम प्रस्थापित केला. आक्रमक आणि प्रतिस्पध्र्यावर वर्चस्व गाजवणाऱ्या संगकाराला शेवटच्या सामन्यात मात्र एकेका धावेसाठी झगडावे लागले.
शैलीदार आणि कलात्मक फलंदाजीसाठी प्रसिद्ध जयवर्धनेला शेवटच्या सामन्यात लौकिकाला साजेसा खेळ करता आला नाही. ४४८ एकदिवसीय सामन्यांमध्ये १२,६५० धावा नावावर असणाऱ्या जयवर्धनेला शेवटच्या स्पर्धेत संघाला यशोशिखरावर नेता आले नाही.
२०११च्या विश्वचषकात या दोघांच्या सुरेख प्रदर्शनाच्या जोरावर श्रीलंकेने अंतिम फेरीपर्यंत मजल मारली होती. मात्र भारताने जेतेपदावर कब्जा केला. यंदाही हे दोघे श्रीलंकेचे जेतेपदाचे स्वप्न प्रत्यक्षात साकारणार अशी चिन्हे होती. मात्र या विश्वचषकातही या जोडगोळीचे स्वप्न अधुरेच राहिले.
वैयक्तिक अफलातून खेळ करणाऱ्या या दोघांनी एकत्रित केलेल्या भागीदाऱ्यांनी श्रीलंकेला असंख्य संस्मरणीय विजय मिळवून दिले आहेत. मात्र दक्षिण आफ्रिकेविरुद्ध ही जोडगोळी २४ चेंडू टिकली आणि तिथेच श्रीलंकेच्या पराभवावर शिक्कामोर्तब झाले.
खेळाला अलविदा करण्याची हीच योग्य वेळ आहे. प्रत्येक सामना, प्रत्येक दौरा, स्पर्धा नवीन आव्हाने सादर करते. त्यांचा सामना करणे हेच कारकीर्दीत माझ्यासाठी खडतर होते. खेळात सातत्याने सुधारणा करत संघाच्या विजयात योगदान देण्याचा प्रयत्न केला. शारीरिक, मानसिक व डावपेचात्मकदृष्टय़ा प्रतिस्पध्र्याना नामोहरम करण्याचे समाधान वेगळेच आहे. संगकारा महान खेळाडू आहे. त्याचे योगदान शब्दातीत आहे. त्याच्यासोबत खेळण्याचा आनंद अनोखा आहे.
महेला जयवर्धने
मी क्रिकेट खेळायला सुरुवात केली, तेव्हा महेलाने संघातले स्थान पक्के केले होते. त्याच्या खेळातून मी अनेक गोष्टी शिकलो. आम्ही असंख्य तास मैदानावर एकत्र खेळलो, सरावात एकत्र असायचो, जेवताना, प्रवासात एकत्र असायचो. आम्ही एकमेकांचे घट्ट मित्र कधी झालो कळलेच नाही. महेलाचे क्रिकेटला योगदान अतुलनीय असे आहे. आंतरराष्ट्रीय स्तरावर सातत्यपूर्ण कामगिरीसाठी कठोर मेहनतीशिवाय पर्याय नाही. तासन्तास सराव हीच गुरुकिल्ली आहे. चुकांतून शिकणे अतिशय महत्त्वाचे आहे. श्रीलंकेच्या क्रिकेटचे भवितव्य असंख्य गुणी युवा खेळाडूंच्या हाती आहे. खेळाडू घडतात, मोठे होतात, खेळ पुढे सरकत जातो. कारकीर्दीत मला साथ देणाऱ्या प्रत्येकाचे मनापासून आभार.
– कुमार संगकारा
