कोणी फिट माणसं देता का?

(शिखर धवनसारखा मिशीला पीळ देत चंपक तोताराम दरबारी येतो)
चंपक : मूँछों का कमाल है सब!
तोताराम : अगदीच. आयसीसीची स्पर्धा म्हटली की मिशाळजींना चेव चढतो.
चंपक : रोहित शर्माने शतकाचा ‘मौका’ वाया घालवला. तुम्ही म्हणालात तसं आर्यलड फिरकीच्या जाळ्यात अडकले.
तोताराम : अहो त्यांना चांगल्या दर्जाच्या फिरकीसमोर खेळण्याचा अनुभवच नाही. त्यामुळे होतं असं. सुरेश रैनाही त्यांच्यासाठी मोठा फिरकीपटू.
चंपक : आपण सुसाट चाललोय, जिंकायचं ठरवलंय आपण तुम्ही सांगता तसं.
तोताराम : मी किंवा विठ्ठलपंत सांगतो म्हणून नाही. त्यांनी चंग बांधलाय चांगलं खेळण्याचा, म्हणून होतंय.
चंपक : श्रीलंका सरशी साधणार ना स्कॉटलंडवर.
(विठ्ठलपंत गडद निळ्या रंगाचं कार्ड हाती देतात)
तोताराम : श्रीलंका जिंकेल मात्र खरी समस्या वेगळीच आहे. त्यांना हवीत फिट माणसं. साथ आल्यासारखी प्रत्येक मॅचमध्ये माणसं दुखापतग्रस्त होत आहेत त्यांची. कसं आहे राखीव मंडळी असतात पण दूर श्रीलंकेतून ऑस्ट्रेलिया-न्यूझीलंडमध्ये यायला वेळ लागतो. आल्यावर जेटलॅग वगैरे. पूर्णफिट ११ माणसं अप्रूप आहे त्यांच्यासाठी. संगकारा पेटलाय एकदम. मलिंगाला चमकण्याची संधी आहे. रंगना हेराथ फिट झाला तर धमाल येईल.